Vizconde Massacre Supreme Court Decision

Vizconde Massacre

Makatarungan ba ang hatol ng Korte Suprema sa kaso ng Vizconde Massacre?

Ang tanong na ito ay laging may dalawang panig, ang panig ng mga biktima at panig ng mga akusado at alam nating kapwa saliwa ang desisyong nais ng bawat panig.

Halos dalawang dekada na ang lumipas ng maganap ang tinatawag na krimen ng dekada, ang Vizconde Massacre at para sa mga kabataang hindi na pamilyar sa pangyayari, hayaan ninyong ito ay aking ibahagi.

Hunyo 30, 1991 ng walang awang paslangin ang mag-iinang Estrellita (edad 47) Jennifer (edad 7) at Carmela (edad 18) na ginahasa pa bago pinatay.  Lahat ng saksak na tinamo ng bawat isa ay hindi bumababa sa 13 at naganap ito sa bahay ng mga Vizconde sa BF Homes, Paranaque. Ang ama ng pamilya ay nasa Estados Unidos ng panahong iyon at naghahanapbuhay. Ngayon ay tagapangulo ng Volunteers Against Crime and Corruption (VACC) si Ginoong Vizconde.

Naging tampok na kaso ang nangyari dahil ang halos lahat ng mga akusado ay mula sa kinikilala at mayayamang pamilya gaya nina Hubert Webb anak ng dating basketbolista at senador Freddie Webb Antonio Lejano II na anak ng aktres na si Pinky de Leon at pamangkin naman ng kilalang aktor na si Christopher de Leon;  Hospicio “Pyke” Fernandez na anak ng isang retired na commodore; Michae Gatchalian at Miguel Rodriguez na kapwa anak ng mga kilalang abogado, si Peter Estrada na anak ng mayamang negosyante at ang dalawang di na nahuling suspek na sina Joey Filart na pinaniniwalaang kamag-anak ng dating NCP commander chief na si Marino Filart at Artemio Ventura na anak naman ng isang kilala ding negosyante. Nasabit naman sa kaso si Gerardo Biong  dahil sa pagsira sa mga ebidensiya ng krimen.

May mga lumutang na testigo para idiin ang grupo ng mga nabanggit na tao at ito ay sina Jessica Alfaro (star witness ng mga biktima), ang guwardiya ng subdibisyon na sina Justo Cabanacan at Normal White. Maging ang dalawang katulong ng mga Vizconde at isang enhinyero na nagngangalang Manciano Gatmaitan.

Samantalang 147 na pahina ng ebidensiya naman ang iniharap ng mga akusado partikular sa panig ni Hubert Webb na nagpapatunay na siya ay nasa America ng mga panahong iyon at nagbabakasyon.

Sa kainitan ng kaso ay naisapelikula pa nga ang pangyayaring ito noong taong 1993 sa pagganap ni Kris Aquino bilang Carmela Vizconde at ito ay pinamagatang “The Vizconde Massacre (God Help Us)”.  Noong taong 1995 naman ay ang buhay ng star witness na si Jessica Alfaro ang isinapelikula na pinagbidahan ni Alice Dixon, ang “Jessica Alfaro Story”

Bago nahatulan ang mga akusado noong taong Enero 6 taong 2000 ay 5 taon ng nakakulong ang mga akusado. Ngayon ay ibinaba na ang pinal na desisyong mula sa Korte Suprema (Supreme Court) at nagpapawalang sala sa mga akusado at hindi na ito maaaring iapila pa.

Sa panig ng mga Vizconde, ito ay isang napakasakit na desisyon at tuluyang pumatay sa kanilang pag-asang makamit ang hustisya. Ang hinihiling na lang ni Lauro Vizconde, kundi ang mga nasangkot ang may kasalanan sa pagkawala ng kanyang pamilya ay tulungan na lang siyang hanapin ang tunay na maysala.

Sa panig ng mga pinawalang-sala, makikita mo ang saya ng bawat isa kasama ang kanilang pamilya. Kung tunay na hindi sila ang may kasalanan, napakalaking indulto ang inabot nila mula sa simula hanggang sa 15 taon nilang pagkakabilanggo at hindi na yun kailanman maibabalik.

 

Kung makatarungan ang naging desisyon ng Korte Suprema, kayo na ang humusga.

.

Mag-iwan ng Tugon

Fill in your details below or click an icon to log in:

WordPress.com Logo

You are commenting using your WordPress.com account. Log Out / Palitan )

Twitter picture

You are commenting using your Twitter account. Log Out / Palitan )

Facebook photo

You are commenting using your Facebook account. Log Out / Palitan )

Google+ photo

You are commenting using your Google+ account. Log Out / Palitan )

Connecting to %s