Sa Bauang bow!

Dahil sa hindi ko naisama sa malayo-layo ang inang ko…ipinangako ko sa kanyang gagawa kami ng lakad at babalik kami sa lugar ng aking kapanganakan…sa La Union!

5 kaming nagtungo doon at napagpasyahang magpalipas ng gabi sa isang resort, sa Bauang nila gustong mag overnight kaya hanap sa net ng matutuluyan.

Pagkatapos ng aming pagpasyal sa San Fernando ay sumegway din kami ng Baguio para makipagkita sa anak ng dati naming tinirhan. Pagkatapos ng halos 5 dekada ay narito at muling nagkita-kita.

This slideshow requires JavaScript.

Ang paghahanap ng matutuluyan

Siyempre sa mga budget conscious ang unang isinasaalang-alang ay ang presyo, pero dapat kasama din ang magandang mga patotoo ng mga naging kliyente nila.

Sa Priscilla’s Beach Resort (dating Family Beach Resort) kami nagbook. Bukod sa magagandang komento ng mga naging parokyano nila, affordable pa.

Sa rate na P2200 para sa 5 kataong kwarto, ito na ang pinakamura at talagang mababait ang staff nila. Simple ang lugar di gaya ng mga katabi pero malinis, maayos at napakarelax para sa gusto ng tahimik na bakasyon.

At dahil ganitong panahon (bago mag Panagbenga kami nag stay dito) expected na daw na kokonti ang mga taong nagbi beach dahil sa Baguio ang karamihan sa mga turista, lokal man o hindi.

Nag-enjoy kami sa solong paglalangoy sa dagat pati na sa pool ng resort, Halina at samahan kami!

This slideshow requires JavaScript.

Jumpshots at rampahan ni inang (83 taong gulang na siya 🙂 )

This slideshow requires JavaScript.

at mawawala ba ang mga jumpshots ko

This slideshow requires JavaScript.

kaya para sa mga naghahanap ng affordable na tutuluyan pero di tipid sa serbisyo at fun…dito na kayo magpunta.

Ilang highlights pictures ng Priscilla’s Beach Resort.

This slideshow requires JavaScript.

Advertisements

Tara na sa Panagbenga!

Dahil sa napapanahon at nagpapaalala na ang mga followers ko sa FB page na Philippines Gateway, narito ang huling kaganapan ng inyong Dora “ang taong makati ang paa…tara libot na!”

Baguio Flower Festival 2019 o mas kilala bilang Panagbenga

Dahil alanganin na ang oras ng pagdating, nahiya na akong abalahin pa ang mga pamangkin ko para makituloy. Sabi ko sa Burnham Park na lang ako magpapalipas ng gabi. Pero hindi pala ganoon kadali iyon at narito ang ilang paalala kung nais niyong magpalipas ng gabi sa Burnham.

Una, ipinagbabawal ang pagtatayo ng mga tent doon. Mahigpit kasi ang seguridad at naniniguro lang ang otoridad  na walang maaaring gawin sa loob ng tent ang mga bisita. Bawal ang manigarilyo sa pampublikong lugar, iilang lugar lang ang piling maaari niyong panigarilyuhan, P1000 ang multa o isang araw na community service. Kaya kung me mga bata kayong dala e doble paghahanda na lang.

Ikalawa, sobra ang lamig na kahit pa nagsapin na kayo sa lupa e ang hamog naman ang kalaban, mababasa talaga ang inyong higaan kundi ito nakasecure. Dalhin ang mga kakailanganin sa panahong ganito. Akala ko kasi dahil maraming tao e medyo mainit na ang klima doon.

Ikatlo, kundi talaga kayo sanay sa outdoor camping, wag niyo ng isipin pang magpalipas ng gabi o matulog sa park dito. Hindi kayo patutulugin ng klima at yung bawat kaluskos ay dinig na dinig mo pati halos ang hinga ng taong malapit sa iyo.

ikaapat, at siyempre lagi kang alerto sa iyong mga gamit, baka nga ikaw ay maidlip at masalisihan lalo na kung mag isa ka lang at walang makakasama o makapalitang magbantay sa mga gamit niyo.

Ikalima, wag kalimutan ang power bank, walang mapagcha charge an ng mga cellphones dito.

Ikaanim, ihanda ang sarili sa paggamit ng pampublikong palikuran. Bawat gamit ay may bayad depende sa gagawin (na likas naman talaga). Ikunsidera ang lamig ng panahon kaya madadalas ang pagwiwi dito. Maging mahinahon dahil laging mahaba ang pila.

Ikapito, wag akalaing magiging mahaba ang tulog niyo. Ika-3 pa lang ng madaling araw ay umiikot na ang otoridad gamit ang megaphone upang paalisin ang mga sasakyang nakaparada sa daraanan ng Grand Float parade. Gigisingin na kayo upang paghandain sa pupuwestuhan ninyo. Ipapaala ang pagkain ng almusal, baon ng maraming tubig lalo sa mga bata.

Pinili kong sa point of origin ako pumunta at maghintay dahil doon ay makikita mo na ang mga nakaparadang floats, mapipicturan one to sawa at pati ang partisipasyon ng mga kalahok. Madaling araw nga lang kaya madilim dilim pa ang kuha. Gumamit ng mga pandagdag na tulong sa inyong gadget para sa maayos na pagkuha ng mga larawan.

Narito ang ilang highlights ng Grand Floats Parade (big and small floats category)

Kuha ito ng di pa sumisikat ang araw.

This slideshow requires JavaScript.

Narito ang mga kuha ng kasalukuyan ng lumalakad ang parada

This slideshow requires JavaScript.

At siyempre ang street dance participants

This slideshow requires JavaScript.

Huling paalala, ang pagdalo sa ganitong kasayahan ay hindi biro. Kakailanganin talaga ang lakas ng katawan at haba ng pasensiya. Minsan na akong nakadalo sa Sinulog Festival ng Cebu at maikumpara ko lang. Sa Cebu, may mga ginagawa silang tuntungan ng mga manonood hanggang ikatlong patong. Ibig sabihin, ang mga manonood sa Sinulog ay nakaupo sa gilid ng daan na daraanan ng Parada. Hindi nakatayo at nagtutulakan kaya di mo mararamdaman ang ngalay at lahat ay kumportable.

Hindi ganito sa Panagbenga, lahat dito ay nakatayo at kanya kanyang hanap ng pwesto upang makita at makunan ang parada na kadalasang nagreresulta ng gitgitan, tulakan, init ng ulo at kadalasang dukutan at laslasan ng bag. Grabe ang sakit ng aking mga binti, hindi dahil sa pagtayo kundi sa pagpipigil na huwag madala ng mga nagtutulak sa likuran. Hindi ako pwedeng matumba dahil kawawa yung mga may edad na nasa aking harapan. Patang-pata ang aking mga paa pagkatapos ng panonood.

Kaya sa mga di pa nakakaranas manood ng Panagbenga, paghandaan ang lahat ng aking mga paalala.

Hanggang sa muling paggala ni Dora lakwatsera!

Hubad na pagkatao

Kahalagahan


Hindi ko kasalanang maglakad sa gabi
At sipulan ng mga lalaki
Hindi ko kasalanang ako ay mahipuan
At sabihin mo lang na ika’y nagagandahan.

Hindi ko kasalanang malaki ang aking dibdib
At pag-isipan mong ako ay isang puta
Hindi ko kasalanang sa aking paglalakad
Ikaw ay nakatitig sa pagitan ng aking mga hita.

Hindi ko kasalanang madumi ang iyong isip
At pagnanasa mo ay iyong ipilit
Hindi ko kasalanang gawin mong libangan
At pagkababae ko ay hindi pahalagahan.

Hindi ko kasalanang ako ay maisilang
Sa isang patriyarkal na lipunan
Hindi ko rin kasalanang aking maranasan
Diskriminasyong hindi kagustuhan

Ngunit kasalanan ko ang manatiling tahimik
At kimkimin ang poot sa akin lang dibdib
Kasalanan ko ang payagan kang ako ay tapakan
At walang gawing kahit anuman

Ang aking katawan ay isang templo
Ngunit hindi nang kung sino-sino
Babae ako at isang mapagpasya
Babae ako…isang mahalaga.

————————

Kasalanan mo

 

Kasalanan mo ang hindi pagkibo
Habang ang marumi niyang kamay ay humahaplos
At hinahayaan siyang galugarin ang iyong katawan
Na siyang templo ng iyong pagkatao
At tahanan ng iyong dangal
Kapalit ng kaunting pabor na hindi mo naman hiningi
Kapalit ng iyong pilit na pagbali
Sa katwiran at katotohanang nakakasulasok
Kapalit ng iyong pagpikit.

Kasalanan mo ang hind pagtutol
Habang naririnig mo ang mga sipol
At tawanang sa iyo patungkol
Hindi iyan paghanga kundi ng pagnanasa
Matinding paghahangad sa pagitan ng iyong mga hita
Habang ang tingin sa sarili mo ay ganggabuhangin
Subalit tikom ang iyong mga labi
At kagat kagat, tumutulo ang mga luha
Ngunit patuloy na tahimik ang iyong dila.

Hindi iyan nararapat at hindi lalong tama
Hindi ka naririto upang magbigay lamang ng tuwa
Hindi ka isinilang upang lunukin ang kanilang pagdura
At pagdungis sa iyong banal na dangal
Hindi ka pangalawang klase lang sa lipunan
Ikaw ang tatag na nagluwal sa sangkatauhan
Nagbigay ng buhay mula sa mga dibdib mong mayaman
Kaya nararapat lang na di ka gawing kasangkapan
Ng “libido” nilang marungis, walang galang.

Huwag mong ipinid ang iyong pandinig
Sa panawagan ng pagputol sa pananahimik
Isa kang mabisang instrumento ng pagbabago
Isa kang sandigan ng kapwa mo kabaro
Tinatawagan ka ng ating panahon
Upang tumindig at siyang mamuno
Para bigyang tuldok ang sekswal na karahasan
Na iniluwal ng patriyarkal na lipunan
Nang pag-aakalang ito ang katotohanan.

Makikinig kami sa iyong pagsasalita
Pakikinggan ng mundo ang mariin mong pagtutol
Uunawain ng sangkatauhan ang iyong kalungkutan
Yayakapin ka at patuloy na ititindig
Humayo ka at iyong pakawalan
Ang lakas mong sinusupil, umigkas ka at lumaban
Liparin ang isang malayang lipunang hindi ka sisinuhin
Hindi na titingnang dibdib lang na lumalakad
Hindi na matatakot sa dilim ng gabi.

Hindi ka na matatakot.

———————–

#MeToo

Bakit may mga araw na ginigising ako ng isang bangungot
Ng isang panahon ng pagkabata, inosente, walang bahid
Habang hinahaplos ng isang prinsipal ang murang pagkababae
At pinagkukunwang pinupunasan ang kanyang mesa.

Hindi ako kumikibo, hindi makakibo
Pilit inuunawa ang mga nagaganap
Nakatingin sa kanyang mata at mukhang nakangisi
Habang may hinahagod sa loob ng kanyang pantalon.

Anim na taon, ano aking muwang
Bakit ang kamusmusan iyo nang pinagsamantalahan
Kapalit ng piso at apatnapung sentimo
Na pilit inilagay sa aking mga kamay.

Bakit mayroon akong hindi magagap
Paglabas ko ng iyong tanggapan
Isang hapong wala ng mga tao
Kundi tayong dalawa na lamang.

Bakit habang tinitingnan ko ang mga barya
May nararamdaman akong hindi tama
May naramdaman na akong pagkahiya
May lungkot na, may malisya.

Nagagalit ako bakit mo inagaw
Ang kainosentihan ng isang batang walang muwang
Bakit kailangang gawin mo iyon
Bakit kailangang buntunan mo ng pagnanasa.

Hinding hindi ko malilimutan
Nang mabalitaan kong ikaw ay pumanaw
Ilang taon lang ang nagdaan
Matapos ang iyong kahalayan.

Hindi ko malilimutang hindi ako nalungkot
Habang ang buong eskuwelahan ay nagluluksa
Bakit may saya sa aking puso
Nang mabalitaan ang iyong pagyao.

At may mga gabing dinadalaw pa din ako ng bangungot.

——————

Ang 3 tulang ito ay kalahok sa Saranggola Blog Awards 10

Belenismo 2017

Pormal ng binuksan ang taunang Belenismo sa lalawigan ng Tarlac. At narito ang ilang belen na aming napuntahan.

Munisipyo ng Capas

This slideshow requires JavaScript.

GR8 Multipurpose Cooperative

McDonalds Luisita

Robinsons Luisita

SM Tarlac

This slideshow requires JavaScript.

Intellect Building

Citymall

This slideshow requires JavaScript.

at ang lagi ng pinakahihintay…ang Belen ng mga sundalo sa Kampo Heneral Servillano Aquino. Sa taong ito ang tema ay kapayapaan at pagkakaisa lalong lalo na sa Marawi.

This slideshow requires JavaScript.

Hanggang sa susunod na taon!

Batanes of the West

For the first time ay sinubukan kong makasama sa isang group tour para lang makapaglamyerda na di na nag-iisip ng lugar ng pupuntahan. Nakita ko ang travel page na iyon na nag-appear sa FB ads at agad kong kinontak. Dalawa ang pagpipilian kong lugar ang Potipot at ang Batanes of the West, sa huli kami natuloy. Sa halagang P1300 per pax ay sulit na din ang offer. At ito ay matatagpuan sa lalawigan ng Bataan.

Ang unang destinasyon Sisiman San Miguel Rock, Sisiman Lighthouse, Sisiman Grotto

This slideshow requires JavaScript.

Sumunod na destinasyon Five fingers Cove to cove adventure, Panoypoy, Apatot cove, Nagbintana Arc, Tinanlakan Cliff Diving Spot, Natsu Lagoon, Bat Cave

This slideshow requires JavaScript.

This slideshow requires JavaScript.

Mawawala ba ang paliligo? Laki Death Pool, Laki white sand beach kung saan kami nananghali kasama ang sariwang buko…wow sarap!

This slideshow requires JavaScript.

Enjoy din sa group pix from drone ng isa naming kasama…saan ka pa haha.

This slideshow requires JavaScript.

 

Siyempre pa ang ipinagmamalaking Batanes of the west view na talaga namang panoramic ang dating lalo at papalubog na ang araw ng aming marating.

This slideshow requires JavaScript.

Overall comments, puyat lahat at pagod sa halos maghapong paglalayag sa dagat para sa hopping pero sulit na sulit naman sa mga pictorials at nakakatuwang game na game lahat sa tour na iyon kahit madami ang di magkakakilala.

Ang verdict? Mauulit pa uli ng marami sa mga susunod na araw.

Ito po ang inyong Dorang gala…bow!

SMRC Charity Ride at Our Bacud Charities

Muling nagsagawa ng charity ride ang Sym Moto Riders Club (SMRC) sa Arayat Pampanga at sa pangalawang pagkakataon ay ang Our Bacud Charity uli ang recipient.

This slideshow requires JavaScript.

SMRC Riders Strikes again

Halos 50 SMRC riders ang muli na namang nagkatipon-tipon mula sa mga lalawigan ng Tarlac, Pampanga, Bataan, Bulacan at ang NCR chapters at nagpamigay ng mga school supplies sa mga kabataang pinangangalagaan ng Our Bacud Charities na pinamumunuan ni Ginoong Mariano (Boie) Gabay Jr.

This slideshow requires JavaScript.

Ang Pagsisimula

Isa itong Non-profit organization na nagsimula lang sa pagtatanim ng mga gulay at halamang gamot mahigit dalawang taon na ang nakakaraan.

Ibinahagi ni G. Gabay na ito ay inspired sa yumao niyang ina…ilang pirasong talong sa harap ng bahay at naunti-unti hanggang ang mga paligid na lupain ay natamnan na din. Mula sa mga donasyong kawayang bakod ng tanim niya (kaya Bacud) ay may sumobrang P4000 na ginamit niya sa unang feeding sa mga kabataang anak ng mga kasama niyang informal settlers ng lugar. Maraming nakaalam at sumuporta sa mga proyekto kasama na din ang mga magulang at iskolar ng Charities.

Napakarami pang mga plano ang nakahatag at aminado si G. Gabay na hindi niya kakayanin ang lahat ng ito…nabanggit nga niya na kung may “aampon” lang sa programa at ipagpapatuloy ang kanyang nasimulan ay handa siyang sumuporta sa abot ng kanyang makakaya. Kasalukuyan siyang nagtatrabaho as part time sa Munisipyo at di pa niya kakayanin ang mag full time para tutukan ng husto ang charity.

Salamat na lang daw at napakaraming bukas ang palad sa pagtulong (gaya ng mga riders at ilang indibidwal) kaya nakakasalba sa pangangailangan ang mga proyekto.

This slideshow requires JavaScript.

Hindi matatawarang saya

Bakas sa mukha ng mga kabataan at mga magulang na naroon ang kasiyahan kahit sa munting tulong na kanilang natanggap at ganundin naman sa mga nagbahagi ng tulong.

Masaya ako na sa pagkakataong ito ay nakasama akong muli sa isang makabuluhang paglalakbay..pagod ang katawan pero di matatawaran ang kasiyahan.

Isang pagpupugay sa SMRC!

 

Isang Pasasalamat….Maui Atienza

Noong ika-15 ng Mayo ay nangyari sa akin ang isa sa hindi gugustuhin ng sinuman sa atin…ang mawalan ng wallet na kung saan naroroon ang mga IDs, ATM at maging ang Credit cards.

Hindi ko sinasadyang sa bulsang likuran ng aking short ilagay ang wallet na iyon, nawaglit lang sa isip ko na ito at hindi ko naialis dito. Napansin kong nawawala na ito ng ako ay nakasakay na ng bus mula Cubao pauwi ng aming lalawigan. Nangangahulugang sa ilang pagsasalin ko na ng sasakyan nalaglag (o nadukot) at panic to the max ang peg ng lola niyo.

Paanong di ka maaaning, lahat ng kabuhayan ko naroon na at kung sa masamang kamay ito lumagpak…yari ako hahaha. Isama pa ung katotohanang wala akong contact number doon, ang aking address mula sa IDs lang ang maaaring maging daan upang ako ay matunton at maibalik sa akin ang lahat ng naroon…ito ay kung ipapadala ng nakakuha sa pamamagitan ng koreo.

Pag-uwi ng bahay ay ang pagpapablock agad ng credit cards ang una kong ginawa, mabuti na lang at ang kaibigan kong si Jolen sa SBC ay hindi niya pinablock yung card kundi ung maliit na halaga lang na naroon, ito ay kung sakali nga daw na maibalik pa.

Nagdasal ako ng gabing iyon na sana ay sa mabuting kamay napunta ang wallet at natulog na ng mahimbing. Madaling araw (pasado 4 ng umaga) ang kaibigan kong si Juliet ay tumawag upang ipaalam na kinontak siya ng nakapulot sa wallet ko at ito nga raw ay magpapadala ng mensahe kung saan ko ito maaaring makuha. Siya daw si Maui Atienza ng MMDA. Isang malaking pasasalamat sa Panginoon at di nga nagtagal, tumawag si Maui at sinabi ang eksaktong lokasyon ng kanilang tanggapan.

Hndi ako nag-aksaya ng panahon at ako ay nagtungo na sa kanilang tanggapan sa may Orense. Napakagaang kausap ni Maui at nang nakaharap ko na nga siya ay personal at taos-puso akong nagpasalamat sa kanya pati na sa kanyang mga kasamahan.

Ang mga paraang kanyang ginawa.

Makikita mo ang kagustuhan talaga niyang maibalik sa akin ang mga mahahalagang bagay na iyon, mas madali ang balewalain na lang ito, kunin ang kaunting halagang nasa wallet at itapon na lang. Pero hindi, kahit pagod na siya/sila sa naging lakad ng gabing iyon, ang unang naisip niya ay hanapin ako sa Facebook, ngunit sa kadahilanang hindi ko pangalan ang nasa profile ay hindi niya ako natunton. Ano ang kanyang ginawa? nagpost siya sa wall niya at doon nanawagan sa mga maaaring nakakilala sa akin at hiniling niyang i “share” ang post niyang iyon. (Makikita sa time stamp ng post niya ang oras).

At hindi lang doon natapos ang kanilang paghahanap. Katulong ang kanyang kaibigan ay nag search sila sa Google at maswerteng naituro ako sa Pinaykeypoint.org. Ang blog site ng Pinaykeypoint na isang Tour Organizer sa Pinatubo, Anawangin at ilan pang kilalang destinasyon.

 

Hindi araw-araw nating mararanasang mawalan at maibalik muli. Hindi ako magsasawang ibahagi kaninuman na ang kabutihan ay patuloy pa ring nananalaytay at patuloy na magbibigay sa atin ng pag-asang manalig ka lang at ibabalik ng sampung doble ang mga kabutihang iyo ding ibinabahagi sa iba.

Sa MMDA (Metropolitan Manila Development Authority), saludo ako sa inyong mga kawani, lalong lalo na sa grupo ni Maui Atienza ng Treasury (Finance).

Pagpalain nawa kayo ng ating Panginoon.